Wacana Deskripsi

Wacana Diskripsi

Tembung deskripsi asale saka basa Latin yaiku descripcere kang tegese nulis utawa njlentrehake sakwijining bab/perkara.

Wacana deskripsi yaiku wacana kang nggambarake objek  kanthi tujuan supaya wong kang maca ngrasa kaya nyawang dhewek objek kang digambarake.

Dadi, tegese teks deskripsi yaiku wacan kang nggambarake sawijining bab kang adhedhasar kasunyatan, nggunakake tetembungan cetha lan kaprinci. Ancase saka teks deskripsi yaiku menehi penerangan utawa peprincen sawijining obyek saengga pamaca kaya-kaya melu weruh, ngrungokake, ngrasakake, utawa ngalami apa kang dijlentrehake ing teks kasebut. Tuladhane, arep nggawe teks deskripsi babgan omah, mesti kang digambarake yaiku, wujude omah, gedhene omah, jinis wangunane, desain arsitekture, lan bab liyane kang bisa nggambarake omah kasebut. kanthi cara mangkono, pamaca bisa mangerteni blegere omah lumantar teks kang ana.

Deskripsi uga duwe teges perincian utawa gambaran. Mrinci tegese gambarake perkara tartamtu. Carane nulis deskripsi, siswa ngamati (ngemati kanthi premati) objek kang didadekake sumber tulisan. Objek sing dirinci/digambarake bisa samubarang; prastawa, pawongan, kawanan, tanduran, lingkungan, alam, lsp.

Miturut wujud carane njlentrehake, deskripsi kaperang dadi telung jenis, yaiku:

1.  Deskripsi wong utawa barang utawa kewan, yaiku deskripsi kang nerangake babagan ciri fisik utawa melok mata utawa tingkah lakune.

2.  Deskripsi panggonan utawa papan, yaiku deskripsi kang nerangake babagan panggonan utawa papan.

3.      Deskripsi kadadeyan, yaiku deskripsi kang nerangake babagan kadadeyan.

Deskripsi kang adhedhasar pengamatan kalebu rincian/gambaran kasunyatan. Gambaran kasunyatan iki mratelakake yen pawongan, panggonan, kewan, prastawa, barang, lsp Bisa digambarake/dirinci kanthi trep kaya kahanan sing saknyatane.

Tuladha  deskripsi:

a.       Deskripsi barang umpamane bisa njlentrhake warna, model, wujude lsp

b.      Deskripsi pawongan umpamane bisa njlentrehake praupane, dedege, wateke lsp.

Wacan deskripsi tumrap barang bisa ditulis kanthi landhesan ngamati utawa ngrungokake. Tuladhane saka ngrungokake siaran langsung pertandhingan bal-balan lewat radhio siswa bisa nulis wacan deskripsi kang nggambarake kahanane pertandhingan.

Ciri-ciri wacana deskripsi:

1.     Nggambarke samubarang

2. Nggunakake panca indra  (pandeleng, pangrasa, pangrungu, pangganda, lan pangecap).

3.     Bisa ngajak pamaca kaya-kaya pamaca bisa ndeleng dhewe, ngrasa dhewe,krungu dhewe,ngambu/ngganda dhewe,lan ngecap dhewe.

Kaya dene jenis teks liyane, teks deskripsi nduweni struktur. Teks deskripsi iku nduweni rong struktur, yaiku deskripsi umum lan deskripsi bagean, titikane deskripsi umum yaiku awujud pranyatan umum obyek kang digambarake. Dene deskripsi bagean yaiku bagean-bagean obyek kang digambarake.

Kajaba nduweni struktur, teks deskripsi bisa dititeni saka perangan-perangan ing ngisor iki:

1.      Nggabarake sawijining bab.

2.      Anggone nggambarake sawijining bab dilakoni kanthi cara ngrangsang kabeh indera manungsa.

3.      Bisa nggawe pamaca utawa wong sing krungu bisa ngrasakake lan weruh dhewe bab kang digambarake.

4.  Menehi panjlentrehan ngenani obyek kang dideskripsikake, bisa awujud warna, ukuran, sipat lan liya-liyane.

5.      Pola pengembangane awujud spesial lan obyektif.

a.  Pola pengembangan spesial yaiku pola pengembangan teks deskripsi kang adhedhasar urutane wektu.

b.     Pola pengembangan sudhut pandang utawa objektif yaiku pola pengembangan teks deskripsi kang adhedhasar papan lan posisi penulis sajroning nyawang sawijining bab.

Urut-urutane nulis wacana deskripsi:

1.      Nemtokake underaning perkara (tema)

2.      Ngumpulake katrangan kanthi njingglengi bab kanga rep ditulis.

3.      Nyathet perangan-perangan bab kanthi tlesih.

4.  Nulis kasile njingglengi mau kanthi urut, cetha, urip,lan nggunakake tembung-tembung kang trep.

5.     Naliti lan mbenerake ukara supaya dadi karangan kang becik.

Ø  Nemtokake Pokok-pokok Isi Teks Deskripsi

Miturut  papan ukara baku,  paragrap kaperang dadi lima jinis :

1.      Paragrap deduktif

Paragrap deduktif yaiku paragrap kang ukara bakune mapan ana wiwitane paragrap.

Dijlentrehake saka bab kang umum ( kagambarake ing ukara baku ) tumuju bab kang luwih kusus ( kagambarake ing ukara panerang )

2.      Paragrap induktif

Paragrap induktif titikane mapaning pungkasaning/wasananipun / buri paragrap.

Diandarake kanthi cara ngudal bab kang kusus  tumuju bab kang sipate umum.

3.      Paragrap deduktif-induktif

Paragrap deduktif-induktif yaiku paragraf kang ukara bakune mapan ana ngarep lan pungkasaning paragrap. Ukara baku iki mapan ing wiwitan paragrap, sabanjure diterangake lumantar ukara-ukara panerang, nuli disimpulake maneh ing pungkasaning paragrap.

4.      Paragrap ineratif

Paragrap ineratif yaiku paragrap kang ukara bakune mapan ana tengah-tengahing paragrap.

5.      Paragrap tanpa ukara baku

Ora saben paragrap nduweni ukara baku. Nanging ora ateges paragrap kuwi ora nduwe gagasan baku, awit gagagasan baku dipapanake ana kabeh ukara. ukara iki kerep digunakake  ing carita (wacana Narasi)

v  GLADHEN

1.      Andharna kanthi gamblang  apa kang diarani wacana  deskripsi!

2.      Andharna titikane teks deskripsi!

3.      Andharna urut-urutane nulis wacana deskripsi!

4.      Miturut wujud carane njlentrehake, deskripsi kaperang dadi telung jenis. Sebutna lan jlentrehna!

5.      Apa ancase panulisan teks deskripsi?

Tuladha wacana deskripsi :

OMAH ADAT JAWA 

Omah adat Jawa kang salah sijine yaiku Joglo, kang dibangun miturut kapercayan utawa filsafat Jawa. Omah Joglo nduweni ciri kang khas yaiku payone kang dhuwur lan wujude bujur sangkar.

            Wewangunan omah joglo iku ana perangan peerangan kang gumathok, ing antarane yaiku:

1.      Pendhapa

Dhumunung ing ngarep dhewe, fungsi utamane kanggo nampa tamu. Perangan iki tansah dibukak tanpa wates ruwangan. Wujud kang tinar buka iki ora tanpa ngemu teges.Iki aweh pralambang luhure pribadi Jawa kang tansah tinarbuka lan mentingake kerukunan lan kekadangan. Uga nglambangake sipat rinaket ing antarane kang duwe omah karo tamu kang rawuh, luwih-luwih kudu bisa ngurmati. Ruwangan iki uga digunakake kanggo ngrembug sawenehe perkara kang asipat kadonyan. Umpamane ngrembug babagan pagaweyan, bisnis, dagang, lan sapiturute. wujud ruwangan kang tinarbuka iku uga minangka sawijining karep njumbuhake karo iklim lingkungan kang tropis mula ruwanganne digawe teras kang jembar ing sisih ngarepe, ora kena soroting srengenge amarga kanthi payon gantung kang amba, menthang nganthi tekan pojok-pojok payon joglo.

2.      Pringgitan

Janjane ruwangan iki isih kalebu papan umum/publik. Ing jaman biyen ruwangan iki kerep digunakake kanggo gelar wayang kulit utawa upacara tradhisional liyane. Amarga kerep digunakake kanggo gelar wayang kulit, mula dijenengke pringgitan saka tembung ringgit kang ateges wayang. Wewangunan iki uga ora tanpa teges. Ruwangan iki dibangun kanthi ancas nuduhake yen manungsa iku duwe kewajiban nguri-uri lan ngrembakakake seni lan budaya. Mula ing jamane seni lan budaya tradhisional isih kuncara anjayeng bawana (kondang), amarga img saben omah joglo diwenehi ruwangan pringgitan.

3.      Dalem Ageng

Wujude persegi lan tinutup deneng gedheg ing patang sisih. Perangan iki minangka perangan kang paling penting lan baku ing wewangunan omah tradhisional Jawa. Perangan ndalem iku perangan kang digunakake kanggo kulawarga, mula asipat luwuh tinutup. iki nudhuhake lamun urusan kulawarga iku dirembug kanthi bebarengan, lan wong liya ora kudu ngerti urusan pribadine  kulawarga. Mula pribadine manungsa iku sejatine kudu bisa njaga kawibawane kulawarga, ora kena martakake kahanan kang ana ing sajroning kulawarga. Umpama ana perkara kang kudu dirembug, kudu dirembug kanthi musyawarah kulawarga. Kanthi cara musyawarah bisa ngudhari parkara kang lagi disandhang.

Ruwangan iki minangka ruwangan kang istimewa. Ing wiwitane fungsi utama ruwangan iki saliyane kanggo ngaso utawa turu kang duwe omah , yaiku kanggo nyimpen maneka wujud pusaka lan piranti aji liyane. Kang duwe omah nalika nindakake  ngibadah uga katindakake ing ruwangan iki. Mula ing ruwangan iki dikantheni kasur, dipan, bantal lan guling. Ruwangan iki ateges nudhuhake yen manungsa iku tansah eling marang Gusti kang paring kanugrahan. Tembung nDalem ing masyarakat Jawa uga diarani papan kanggo panggonan. Mula saka kuwi sajroning omah njero iki ana senthong utawa kamar, senthong iku kapilah dadi telu:

1)      Senthong Tengen

Mapan ing sisih tengen, ing kamar iki sumadya amben/dhipan lan piranti kanggo turu liyane, kamar iki kanggo turu lan leren tumrap wong lanang . Mapan ing sisih tengen iku mengku makna manawa wong lanang iku dadi kuwajiban ngayomi wong kang ana sajroning omah kasebut. Papan sisih tengen nduweni makna sinandhi supaya sakabehing gegayuhan iku bisa kasembadan kudu tansah nengenake tumindak kang utama. Lan dadi pangayoman tumrap sing ana sisih kiwane.

2)      Senthong Tengah utawa Krobongan

Papan kanggo nyimpen pusaka lan pamujan marang Dewi Sri. Senthong tengah minangka papan palin suci utawa pribadi kanggone sing duwe omah. Ing sajrone krobongan kasimpen bandha pusaka sing ndhuweni makna gaib sarta pari asiling oanen kapisanan. Dewi Sri uga dianggep minangka kang nduweni omah utawa bandara kang sabenere. Sajroning krobongan sumadya amben, kasur lan guling, yaiku paturon kang sepisanan kanggo penganten anyar, bab iki nduweni makna minangka pasawijen Dewa Komajaya lan Dewi Kamaratih yaiku dewaning katresnan. Papan tengah iku nduweni makna enering panembah konjuk marang Gusti kang amuraba jagad saisine.

3)      Senthong Kiwa

Ing kamar iki sumadyan amben pepak piranti kanggo turu liyane, minangka papan kanggo turu lan ngaso tumrap wong wadon. Papan sisih kiwa nduweni makna tansah ngiwakake lan nyingkiri tumindak kang ala.  Pakarti kang ala kudu disirnakake.

4.      Gandhok utawa Pawon/pekiwan

Gandhok minangka sawijining kamarnsing ana ing sisih tengen lan kiwa Pringitan lan Omah Dalem, wujude wangunan kang dawa lan panggonanne dipisahke saka wangunan utama kanthi latar minangka pemisah; Umume gandhok digunakake minangka papan turu kanggo kulawargane, sanak kulawarga lan panggonannyimpen barang-barang omah lan digunakake minangka lumbung kanggo nyimpen bahan pangan. Gandhok kasusun saka rong ruwangan yaiku Gandhok Kiwa lan Gandhok Tengen.

Gandhok utawa Pawon kang mapane ing mburi dhewe utawa mburi Omah Dalem, fungsine kanggo masak lan kanggo adus. Sanadyan katon prasaja, nanging perangan iki uga minangka perangan kang asipat pribadi lan duwe nilai luhur. Nulad saka guna panganggone, mula dipapanake ana ing mburi, supaya wong liya ora ngerti nalika sin nduwe omah reresik diri lan dhahar. Bab iki nuduhake yen menungsa iku duwe sipat setiti lan ngati- ati, tegese ora boros lan tansah njaga kapribadene kang siningit.

v  Nilai kang kakandhut saka wacana  deskripsi Omah Adat/tradisional Jawa :

Ø Nilai Adat / Tradhisi

      Adat bisa uga tradhisi wis dadi pakulinan turun temurun sajroning masyarakat. Sajroning tradhisi kakandhut akeh kearifan, pituduh paling caket nindakake kabudayan kanggo bangsa lan negara. Ana ne omah adat Jawa iki ngandhut nilai tradhisi utawa adat Jawa kang ndhisike amung diduweni dening para penggede lan kerabat bangsawan.

Ø Nilai Historis (sejarah)

      Anane Omah adat Jawa mujudake fakta sejarah kang nganti saiki isih tinemu ing masyarakat Jawa, mligine Jawa Tengah. Kandhutan nilai sejarah iki bisa didakeake dhata budaya kita kang  sejatine kudu tetep dilestarikake.

Ø Nilai Budaya

      Omah adat tinggalane para leluhur, mligine omah adat joglo, klebu salah siji asil kabudayan kang nduweni makna filosofis budaya Jawa. Anane motif utawa ragam hias kang digunakake ing wangun omah adat joglo nuduhake bukti anane budaya kang kudu dimangerteni dening para generasi mudha.

Ø Nilai Agama/ Religi

      Wangun omah adat Jawa iki diwangun kanthi netepake werdi kang becik. saben bagean omah nduweni werdi lan guna dhewe-dhewe, klebu kanggo kagiyatan ibadah kulawarga kang nduweni omah kasebut. Bab iki dadi bukti menawa omah adat joglo iku ngandhut nilai agama.

PANDADARAN

A.    Wenehana tandha ping (X) ing aksara a, b, c, d utawa e ing wangsulan kang bener !

1.      Ing ngisor iki babagan kang digambarake ing teks deskripsi, kajaba....

a.       kaendahan alam

b.      kahananing jasmani

c.       papan panggonan

d.      watak

e.       pengalaman pribadi

2.      Teks deskripsi nduweni perangan-perangan kang mbedakake karo jenis teks liyane. Ing ngisor iki klebu perangan teks deskripsi, kajaba....

a.       nggambarake sawijining bab

b.      bisa nggawe pamaca kaya kaya ngrasakake lan weruh dhewe bab kang digambarake

c.       nggambarake sawijining bab kanthi cara ngrangsang kabeh indera manungsa

d.      jlentrehake prastawa kanthi urut-ututan wektu

e.       pola pengembangan awujud spasial lan objektif

3.      Pura mangkunegaran yaiku istana papan palenggahane Sri Paduka Mangkunegara ing Surakarta lan diwangun sawise taun 1757 kanthi nurut modhel kraton kang luwih cilik. Secara arsitektur, wangunan iki nduweni ciri kang padha karo kraton  yaiku ing bagean pendhapa, pringgitan, dalem lan kaputran, kang kabeh iku diubengi  tembok kang bakoh.

bab kang dirembug ing paragrap deskripsi kasebut, yaiku...

a.       Sri Paduka Mangkunegara

b.      modhel omah ing Surakarta

c.       Pura Mangkunegaran

d.      Kraton Solo

e.       ciri arsitektur pura

4.      (1) Nyathet perangan-perangan bab kanthi tlesih.

(2) Nemtokake underaning perkara (tema)

(3) Naliti lan mbenerake ukara supaya dadi karangan kang becik

(4) Ngumpulake katrangan kanthi njinggleni bab kanga rep ditulis.

(5) Nulis kasile njingglengi mau kanthi urut, cetha, urip,lan nggunakake

      tembung-tembung kang trep.

Urut-urutane nulis wacana deskripsi:

a.       1, 2, 3, 4, 5

b.      2, 1, 4, 5, 3

c.       2, 4, 1, 5, 3

d.      2, 1, 4, 3, 5

e.       2, 4, 1, 3, 5

5.      Museum Diponegoro manggon ing Magelang, persis ing dalan Diponegara No. 1. Gedhunge manggon ing sisih kiwa Pendhapa Karesidhenan Kedu kang dibangun 1810. Ing kene biyen Pangeran Diponegoro diapusi dening Walanda. Ing museum iki kasimpen meja kursi kang ana guratane kuku pangeran dipanegoro, klambi kang ukuran  dhuwure 1,57 meter lan ambane 1,35 meter, digawe saka bakal shantung.

Wacana deskripsi ing dhuwur  klebu deskripsi...

a.       deskripsi panggonan

b.      deskripsi uwong

c.       deskripsi barang

d.      deskripsi kadadeyan

e.       deskripsi kewan

6.      Apa kang dadi pokok wacan ing dhuwur?

a.       Museum Diponegoro

b.      Jalan Diponegoro

c.       Pangeran Diponegoro

d.      Klambine Diponegoro

e.       Perang Diponegoro

7.      Ing jaman biyen ruwangan iki kerep digunakake kanggo nggelar wayang kulit utawa upacara tradhisional liyane. Amarga kerep digunakake kanggo nggelar wayang kulit, mula dijenengke ….

a.       Pendhapa

b.      Dalem Agung

c.       Pringgitan

d.      Krobongan/senthong

e.       Gandhok atau Pawon/pekiwan

8.      Ing perangan njero omah Joglo ana kang diarani gedhongan kang diembakake kaya dene mihrab, papan panggonan kanggo imam kang mimpin shalat. Bab iki nglambangake….

a.       Sapa pawongan kang duwe omah

b.      Manungsa iku makhluk sosial kang ora bisa nglakoni urip kanthi dhewekan.

c.       Karukunan lan katarbukan

d.      Saliyane dadi papan panggonan ngeyup, bisa uga kanggo papan ngabekti marang Gusti kang dipercaya.

e.       Manungsa kudu duwe sipat prihatin lan ngendhaleni hawa nepsu yen pingin kepenak ing tembe mburine.

9.      Ing omah Joglo payon digawe wujud trap-trapan lan undha usuk mendhuwur. Bab iki mralambangake....

a.       Manungsa kudu duwe sipat prihatin lan ngendhaleni hawa nepsu yen pingin kepenak ing tembe mburine.

b.      Ana sesambungan antaraning manungsa lan manungsa, manungsa karo Gustine.

c.       Manungsa iku makhluk sosial kang ora bisa nglakoni urip kanthi dhewekan.

d.      Karukunan lan katarbukan

e.       Saliyane dadi papan panggonan ngeyup, bisa uga kanggo papan ngabekti marang Gusti kang dipercaya.

10.  Cagak cacah papat kang ana ing sisih tengah omah joglo diarani....

a.       Umpak

b.      Soko guru

c.       Pengeret

d.      Blender

e.       Sunduk

11.  Desain omah joglo ora namung nduweni nilai estetika, nanging uga ngandhut piwulangan kang becik. Bab iki bisa dijupuk saka ancase wujud lawang dalem kang luwih andhap saenggo ndadekake dhayoh kang ngliwati lawang kasebut kudu nundukake mustaka. Menawa mustakane ora ditundhukake mengko bisa ketatap. Piwulang kang bisa dijupuk saka wujud lawang ing omah joglo kasebut yaiku piwulang sopan santun.

Bagean omah joglo kang dirembug ing wacan kasebut yaiku....

a.       pendhapa

b.      senthong

c.       lawang

d.      pawon

e.       cagak

12.  Piwulang kang bisa dijupuk saka tumindak nundhukake mustaka nalika mlebu omah joglo yaiku.....

a.       unggah ungguh basa

b.      kaendahan

c.       sopan santun

d.      karukunan

e.       katresnan

13.         

Manut bentuk payone gambar omah ing dhuwur kalebu jenising omah adat Jawa....

a.       Joglo

b.      Limasan

c.       Kampung

d.      Panggang Pe

e.       Tajugan/Masjidan

14.         

Manut bentuk payone gambar omah ing dhuwur kalebu jenising omah adat Jawa....

a.     Joglo

b.    Limasan

c.     Kampung

d.    Panggang Pe

e.     Tajugan/Masjidan

15.         

Manut bentuk payone gambar omah ing dhuwur kalebu jenising omah adat Jawa....

a.       Joglo

b.      Limasan

c.       Kampung

d.      Panggang Pe

e.       Tajugan/Masjidan

16.  Omah adat joglo iku mujudake fakta sejarah kang nganti saiki isih tinemu ing masyarakat Jawa, mligini Jawa Tengah, ateges omah adat joglo nduweni nilai...

a.         adat

b.        budaya

c.         agama

d.        historis

e.         tradhisi

17.  Wangunan omah adat Jawa iki diwangun kanthi netepake werdi kang becik. Saben bagean omah nduweni werdi lan guna dhewe-dhewe, kalebu kanggo kegiyatan ibadah kulawarga kang dhuweni omah kasebut. Bab iki dadi bukti menawa omah adat joglo iku uga ngandhut nilai........

a.       adat

b.      budaya

c.       agama

d.      historis

e.       tradhisi

18.  Ruwangan kang wujude persegi lan tinutup dening tembok ing patang sisine. Perangan iki minangka perangan kang paling penting lan baku ing wewangunan omah tradhisional Jawa. Dene kang digunakake kanggo kluwarga, mula asipat luwih tinutup (privasi), yaiku ….

a.       Pendhapa

b.      Krobongan/senthong

c.       Pringgitan

d.      Gandhok atau Pawon/pekiwan

e.       Dalem Agung

19.  Ruwangan iki minangka ruwangan kang istimewa. Ing wiwitane fungsi utama ruwangan iki saliyane kanggo ngaso utawa turu kang duwe omah, yaiku kanggo nyimpen maneka wujud pusaka lan piranti aji liyane. Ruwangan iki diarani ….

a.       Pendhapa                             

b.      Krobongan/senthong

c.       Pringgitan                                         

d.      Gandhok atau Pawon/pekiwan

e.       Dalem Agung

20.  Papane ana ing mburi dhewe. Fungsine kanggo masak lan kamar mandi. Sanajan katon prasaja, nanging perangan iki uga minangka perangan kang asipat pribadi lan duwe nilai luhur, yaiku ….

a.       Pendhapa                                         

b.      Krobongan/senthong

c.       Pringgitan                                         

d.      Gandhok atau Pawon/pekiwan

e.       Dalem Agung

B.     Jumbuhna pitakonan ing ngisor iki marang wangsulan kang wis cumepak ing satengene!

1.      Wewangunan kang nduweni payon mung sesisih, iku diarani... 2.      Ing jaman biyen ruwangan iki kerep digunakake kanggo nggelar wayang kulit utawa upacara tradhisional liyane. Amarga kerep digunakake kanggo nggelar wayang kulit, mula dijenengke …. 3.      Watu sangganing cagak utawa kang kanggo ganjel cagak diarani... 4.      Wong iku kudu nduweni wawasan kang jembar, tresna marang sapadha-padhaning urip tanpa mbedakake siji lan sijine, kabeh karengkuh tan mingkuh lan rasa pakewuh. Ukara iki nudhuhake makna filosofi kanggo bagean omah.... 5.      Balungan omah kang minangka pambenggange cagak, yaiku.... 6.      Sing nyangga wuwungan utawa molo iku diarani.... 7.      Pola pengembangan teks deskripsi kang adhedhasar urutane wektu..... 8.      Pola pengembangan teks deskripsi kang adhedhasar papan lan posisi penulis sajroning nyawang sawijining bab 9.      Deskripsi kang nggambarake bagean-bagean sawijining obyek .... 10.  Wangunan nganggo saka guru lan patang empyak nanging tanpa wuwungan.....

A.    Deskripsi Umum B.     Ompak C.     Panggang Pe D.    Tajug E.     Deskrepsi Bagean F.      Pangeret G.    Deskrepsi Spesial H.    Deskripsi Objektif I.       Pringgitan J.       Senthong K.    Ander L.     Pendhapa

C.    Wangsulana pitakon-pitakon iki kanthi patitis!

1.      Sebutna lan jlentrehna kanthi gamblang struktur  wacana deskripsi!

2.      Senthong ana tengah diarani krobongan. Apa sebabe diarani papan kang suci? Jlentrehna!

3.      Temtokna idhe pokok paragraf ing ngisor iki!

            Joglo yaiku omah adat tradisional suku Jawa. Omah joglo duweni ciri kang khas yaiku payone kang dhuwur. Ana maneka jenis omah joglo, ing antarane joglo limasan, joglo sinom, joglo pangrawit, lan sapiturute. Omah jinis joglo nduweni struktur wangunan kang unik kang lumrahe nduweni rong bagean pokok yaiku bagean pandhapa lan bagean njero. Anane wangunan omah iki mesthi ana filosfi utawa maknane.

4.      Sebutna lan jlentrehna nilai-nilai kang kakandhut ing teks deskripsi omah adat Jawa!

5.      Nulad saka guna panganggone, apa sebabe pawon lan pakiwan iku dipapanake ana mburi lan apa maknane pakiwan iku? Andharna kanthi gamblang!